يازارع المحبة(عن الآم الصلب وفرحة القيامة)

يازارع المحبة ف عروقى ونبض قلبى

نسيت كل المحـبة وصلبتك وانت ربى



مديت ايديك كتير تحيينى من العدم


دقتهم مســــــــــــامير وزودت الالم



سقتنى حروف من نور علمتنى السماح


سقيتك كاس الخل وطعنتك ف الجراح



ياما حنيت عليا بحــــــــبك العجيب


زدت ف الاسية ورفعتك ع الصليب


* * * *

يازارع التسامح والحب والحنان


ادتنى تاج البر احلى كل التيجان



ضفرت تاج الشوك حطيته فوق جبينك


وكتبت يافطة باينة قــــاصد انى اهينك



حتى هدومك ســـــاعتها قطعتها بايديا


خدت نصيبى منها والقرعة جات عليا



ضمتنى كتير لقلبك حبتنى من غير حدود


وكان ردى جـــــــــاهز لطمتك ع الخدود


* * * *

يازارع الخــــــــــــــلاص وفادى كل الناس


الموت ده مش علشانك الموت علشان الناس



لكن انت بحــــبك مرضتشى انى اموت


ادتنى حياة جديدة وكسرت شوكة الموت



على قد ما عزبتك عـــلى قد ماحبتنى


صحيح انى موتك لكن قمـت واحيتنى



وده عهد جديد ياربى تشهد عليه عنيا


هيفضل حبك ف قلبى ل حــــد الابدية